(UTV | කොළඹ) – රාජපක්ෂ පවුලේ සාමාජිකයන් නොමැති අන්තර්වාර ආණ්ඩුවක් පිහිටුවීම සඳහා ශ්‍රී ලංකා නිදහස් පක්ෂය ඉදිරිපත් කළ යෝජනාව ජනාධිපතිවරයා විසින් ප්‍රතික්ෂේප කළ බවට වාර්තා පළ වී ඇති බව ශ්‍රී ලංකා නිදහස් පක්ෂයේ ජ්‍යෙෂ්ඨ උප සභාපති රෝහණ ලක්ෂ්මන් පියදාස පවසනවා.
මහනුවරදී පැවති මාධ්‍ය හමුවකට එක්වෙමින් පියදාස කියා සිටියේ පවතින දේශපාලන අර්බුදය අවසන් කිරීම සඳහා මීට පෙර ආණ්ඩුවේ සිටි පක්ෂ 11 සහ ස්වාධීන මන්ත්‍රීවරුන් පිරිසක් ජනාධිපතිවරයා සමඟ සාකච්ඡා කළ බවයි.
වත්මන් අර්බුදය විසඳීම සඳහා සියලු පාර්ශ්වයන්ගේ සහභාගීත්වයෙන් නිශ්චිත කාලසීමාවක් සඳහා අන්තර්වාර පාලනයක් ස්ථාපිත කිරීම ඔවුන්ගේ ප්‍රධාන යෝජනාව බව ඔහු පැවසීය.
රාජපක්ෂ පවුලේ කිසිවකු අන්තර්වාර පාලනයේ කොටස්කරුවන් නොවිය යුතු බව ශ්‍රීලනිපයේ අදහස බව රෝහණ ලක්ෂ්මන් පියදාස සඳහන් කළේය.
පවතින ආර්ථික ප්‍රශ්න විසඳා ගැනීමෙන් පසු ප්‍රජාතන්ත්‍රවාදී මැතිවරණයක් කැඳවීමට යෝජනා කළ බව ඔහු පැවසීය.
කෙසේ වෙතත් ජනාධිපතිවරයා එම යෝජනාව පිළිගෙන නොමැති බව පැවසූ රෝහණ ලක්ෂ්මන් පියදාස කියා සිටියේ මෙම පියවරෙන් රට තුළ පවතින දේශපාලන අවිනිශ්චිතභාවය තවත් උග්‍රවීම පමණක් බවයි.
ස්ථාවර පාලනයක් නොමැතිව වත්මන් අර්බුදය විසඳිය නොහැකි බව ඔහු සඳහන් කළේය.
