(UTV | කොළඹ) – අද මධ්‍යම රාත්‍රී 12 සිට පැය 24 ක එක්දින වැඩ වර්ජනයක් ආරම්භ කිරීමට දුම්රිය වෘත්තිය සමිති සන්ධානය තීරණය කර තිඛෙනවා.
ජනතා මතයට සවන් නොදී ආණ්ඩුව තවදුරටත් බලයේ සිටිමට විරෝධය පළ කරමිනුයි මෙම වැඩවර්ජනය ක්‍රියාත්මක කෙරෙන්නේ.
මේ පිළිබඳව අදහස් දක්වමින් දුම්රිය තාක්ෂණ සේවා වෘත්තීය සමිති කමිටුවේ ලේකම් සම්පත් රාජිත කියා සිටියේ ශ්‍රී ලංකා දුම්රිය සේවයට අනුයුක්ත සියලුම වෘත්තීය සමිති සේවයෙන් ඉවත් වන බවයි.
රාජිත පැවසුවේ රජය මහජන ජීවිත අනතුරේ හෙළූ බවත්, මහජනතාවට බඩගින්නේ ජීවත් වීමට පාර කැපූ බවත්, ඔවුන්ගේ ක්‍රියාවන් තුළින් මහජන කෝපය ජනිත කළ බවත්ය.
මැයි 6 වැනි සිකුරාදා වැඩවර්ජනයට සියලු අංශවල වෘත්තීය සමිති එක්වන බව ඔහු සඳහන් කළේය.
එබැවින් සියලු වෘත්තීය සමිති ජනාධිපතිවරයාට සහ රජයට ඉල්ලා අස්විය යුතු බව පැවසූ රාජිත, පාලන ව්‍යුහයේ වෙනසක් අවශ්‍ය බව අවධාරණය කළේය.
වත්මන් ආර්ථික තත්ත්වය යහපත් නොවන බව පැවසූ ඔහු ඉල්ලා අස්වීමට වෘත්තීය සමිති රජයට පැය 24ක කාලයක් ලබා දෙන බවද පැවසීය.
අනතුරුව සියලු අංශවල වෘත්තීය සමිති එක්ව ලබන 11 වැනිදා සිට අඛණ්ඩ වැඩවර්ජනයක් දියත් කරන බවද ඔහු පැවසීය.
