(UTV | කොළඹ) –
පාර්ලිමේන්තුවේ තුනෙන් දෙකක බහුතරයකින් ජනාධිපති ධූර කාලය වසරකින් දීර්ඝ කර ගැනීමේ හැකියාව පිළිබඳව මේ වන විට සාකච්ඡා වෙමින් පවතින බව දේශපාලන ආරංචි මාර්ග සඳහන් කරයි. ඒ සඳහා නීති ක්ෂේත්‍රයේ විශාරදයන්ගේ මතය විමසීමට ජනපතිවරයාට හිතවත් පාර්ශව කටයුතු කර ඇති අතර ඔවුන්ගේ මතය වී ඇත්තේ ජනාධිපතිවරයාගේ ධූර කාලය මේ අයුරින් වසර 5 සිට 6 දක්වා දීර්ඝ කරගැනීමට නීතිමය ප්‍රතිපාදන ව්‍යවස්ථාව තුළම තිබෙන බවයි.
2015 ආණ්ඩුක්‍රම ව්‍යවස්ථාවේ 19 සංශෝධනයෙන් ජනාධිපතිවරයාගේ වසර 6ක්ව පැවති ධූර කාලය වසර 5ක් දක්වා ඒ අවස්ථාවේ අඩු කළා සේ ම පාර්ලිමේන්තුවේ 2/3ක බහුතරයකින් ධූර කාලය වසර 5 සිට 6 දක්වා දීර්ඝ කර ගැනීමට හැකියාවක් පවතින බව ජැමෙයිකා තාක්ෂණ විශ්වවිද්‍යාලයේ හිටපු මහාචාර්ය නීතිඥ ප්‍රතිභා මහානාමහේවා සඳහන් කරයි. ඒ සඳහා ඒ අවස්ථාවේ ජනමත විචාරණයක් නොපැවැත්වුණු බව ද ඒ මහතා පැවසූ බව සඳහන්.
’78 ආණ්ඩුක්‍රම ව්‍යවස්ථාවේ 83(ආ) ව්‍යවස්ථාවේ සඳහන්ව ඇත්තේ ජනාධිපතිවරයාගේ ධූර කාලය හා පාර්ලිමේන්තුවේ කාලය සය අවුරුද්දක් ඉක්මවා දීර්ඝ කරන්නා වූ පනත් කෙටුම්පතක් පාර්ලිමේන්තුවේ 2/3කින් සහ ජනමත විචාරණයකින් සම්මත විය යුතුව ඇත යනුවෙන් යැයි නීතිඥ ප්‍රතිභා මහානාමහේවා මහතා සඳහන් කරයි. යම් විදිහකට ජනාධිපතිවරයාට 2/3ක බහුතරයක් නැතිවුවහොත් ජාතික වැදගත්කමින් යුත් කාරණයක් ලෙස ජනමත විචාරණයකින් සම්මත කර ගැනීමට හැකියාව පවතින බව ද හෙතෙම පැවසීය.
