(UTV | කොළඹ) –
ජාත්‍යන්තර මූල්‍ය අරමුදලේ කොන්දේසි වෙනස් කර ජන ජීවිතය පවත්වාගෙන යෑම සඳහා සහනශීලී ආර්ථික වැඩපිළිවෙළක් සකසා දෙන බව සමගි ජන බලවේගයේ කොළඹ දිස්ත්‍රික් මන්ත්‍රී ආචාර්ය හර්ෂ ද සිල්වා මහතා පාර්ලිමේන්තුවේදී ඊයේ (07) ප්‍රකාශ කළේය.
විදේශීය ණය බරකින් යුක්ත වන මේ රට එම ණය ගෙවීම සඳහා ඉපැයිය යුත්තේ රුපියල් නොව ඩොලර් බවත් ඒ අනුව අපනයන අභිමුඛ ආර්ථිකයක් හරහා ඩොලර් ඉපැයීමට වැඩපිළිවෙළක් සකසා ඇති බවත් මන්ත්‍රීවරයා පැවසුවේය. 2024 වර්ෂයේ මුල් කාර්තුවේදී අත් කරගත් ආර්ථික වර්ධන වේගය තවදුරටත් ශක්තිමත් කරමින් රට සංවර්ධනය කරා ගෙනයෑමට අවශ්‍ය සහාය ලබා දිය යුතුය යන කල් තැබීමේ විවාදයට එක්වෙමින් මන්ත්‍රීවරයා මේ බව කියා සිටියේය.
මන්ත්‍රීවරයා මෙසේ ද කීවේය. රනිල් වික්‍රමසිංහ මහතාගේ ආණ්ඩුවෙන් පෙට්‍රල් රුපියල් 150 සිට 400 දක්වා වැඩි කළා. ඒක ආණ්ඩුවට ලාභයි. පෙට්‍රෝලියම් එකට ලාභයි. අපේ අනෙක් විකල්ප කණ්ඩායම් කියන්නේ බලයට පත් වුණාම ඔවුන් පෙට්‍රල් රුපියල් 200ට දෙනවා කියලා. අප ඒක කියන්නේ නැහැ. අප කියන්නේ ඩිජිටල් තාක්ෂණය හරහා රුපියල් 400 ගෙව්වාට 200 ගෙවිය යුතු පුද්ගලයාට ඉතිරිය ගෙවෙන විදියට වැඩපිළිවෙළක් සකස් කරනවා. මේක දැන් කවුරු හරි කොපි කරන්න පුළුවන්. කොපි කරන්න කලින් හැන්සාඩ්ගත කරන්න කියලා මම ඉල්ලනවා. රුපියල් 400 ගෙවනවා ඉන්කම් කැටගරියට අනුව බැංකු එකවුන්ට් එකට ඉතිරි රුපියල් 200 බැර කරනවා. බෙන්ස් එකේ එන කෙනාට මොකටද රුපියල් 200කට පෙට්‍රල් දෙන්නේ. ඔහු රුපියල් 20,000ක කනවා හවසට. හැබැයි අමාරුවෙන් ගෙවන පුද්ගලයාට තමයි මේ ක්‍රියාවලිය ක්‍රියාවට නංවන්නේ. යැයි ද කීවේය.
