(UTV | කොළඹ) –
සිවිල් ආරක්ෂක බලකායට අයත් සාමාජිකයින්ගේ සුබසාධනය සඳහා රජය විසින් නිවාස ගොඩනැගීමේ ව්‍යාපෘති කිහිපයක් හඳුන්වාදී තිබෙනවා. ඒ අනුව නිවසක් ඉදිකර ගැනීමටත්, පවතින නිවාසවල අලුත්වැඩියා කටයුතු සිදුකර ගැනීමටත් අවශ්‍යකරන ශ්‍රම දායකත්වය සිවිල් ආරක්ෂක බලකාය වෙතින් ලබාදීමට රජයේ අනුමැතිය ලබාදී තිබේ.
පළමු අධියර යටතේ සාමාජිකයින් 100 දෙනෙකු සඳහා, තම නිවස ඉදිකිරීම හෝ අලුත්වැඩියා කිරීමේ දී සිවිල් ආරක්ෂක බලකා සමාජිකයන්ගේ ශ්‍රමදායකත්වය ලබා ගැනීමට අවස්ථාව ලැබේ.
එමෙන්ම වසර කිහිපයක සිට සිවිල් ආරක්ෂක බලකා සාමාජිකයින් විසින් කළ ඉල්ලීමකට ප්‍රතිචාර වශයෙන් දැනට රුපියල් 350 ලෙස ලැබෙන දෛනික සලාක දීමනාව රුපියල් 500 දක්වා ඉහළ දැමීමට ද රජය පියවර ගෙන තිබේ.
