ත්‍රිපෝෂ නිෂ්පාදනය සඳහා වන වාර්ෂික බඩඉරිඟු සහ සෝයා බෝංචි ආනයනය කිරීමට රජය තීරණය කර තිබේ. ඒ අනුව බඩඉරිඟු මෙට්‍රික් ටොන් 6,000ක් සහ සෝයා බෝංචි මෙට්‍රික් ටොන් 300ක් ආනයනය කිරීමට අමාත්‍ය මණ්ඩල අනුමැතිය ලැබී ඇති බව රජයේ ප්‍රවෘත්ති දෙපාර්තමේන්තුව සදහන් කරයි.
දැනට පවතින බඩඉරිඟු සහ සෝයා බෝංචි හිඟය හේතුවෙන් ත්‍රිපෝෂ නිෂ්පාදන ක්‍රියාවලිය සඳහා වාර්ෂික සැපයුම් අවශ්‍යතාව දේශීයව සපුරා ගැනීමට නොහැකි බැවින්, අවශ්‍ය ප්‍රමාණය ආනයනය කිරීමට තීරණය කර තිබේ. ඒ අනුව, ජාතික තරගකාරී ලංසු ක්‍රමවේදය යටතේ බඩඉරිඟු සහ සෝයා බෝංචි සපයා ගැනීම පිණිස ලංසු කැඳවා තිබේ.
එකී ලංසු ඇගයීමෙන් අනතුරුව තාක්ෂණික ඇගයීම් කමිටුවේ සහ අමාත්‍ය මණ්ඩලය විසින් පත් කරන ලද ස්ථාවර ප්‍රසම්පාදන කමිටුවේ නිර්දේශ පරිදි සාරානුකූල ප්‍රතිචාරාත්මක අවම ලංසුකරුවන් වෙත කොන්ත්‍රාත් ප්‍රදානය කිරීම අමාත්‍ය මණ්ඩලය විසින් අනුමත කර ඇති බවද රජයේ ප්‍රවෘත්ති දෙපාර්තමේන්තුව සඳහන් කරයි.
