ජනාධිපතිවරණයේදී තම දරුවන්ගේ කැමැත්තට අනුව වතුකරයේ ජනතාව ඡන්දය භාවිත කළ බවත්, පාර්ලිමේන්තු මැතිවරණයේදී සිය කැමැත්තට අනුව ලංකා කම්කරු කොංග්‍රසය කෙරෙහි විශ්වාසය තබා අලියා ලකුණට ඡන්දය භාවිත කරන ලෙස ලංකා කම්කරු කොංග්‍රසයේ මහ ලේකම් හිටපු ඇමැති ජීවන් තොණ්ඩමන් මහතා වතු සේවකයින්ගෙන් ඉල්ලා සිටිනවා.
එක්සත් ජාතික සන්ධානයෙන් නුවරඑළිය දිස්ත්‍රික්කයට අලියා ලකුණින් තරග කරන ජීවන් තොණ්ඩමන් මහතා ඒ බැව් කියා සිටියේ ඊයේ (16) නොර්වුඩ් නිව්වැලි වත්තේදී මැතිවරණ ප්‍රචාරක කටයුතු ආරම්භ කරමිනි.
පසුගිය සිවු වසරේ තමන්ට ලැබුණු ප්‍රතිපාදන අනුව වතුකරයේ ජනතාවගේ යටිතල පහසුකම් නංවාලීමට කටයුතු කළ බවත්, වතුකරයේ ජනතාවගේ යටිතල පහසුකම් නංවාලීමට මෙතෙක් අවස්ථාව ලැබුණේ එජාප රජයන් යටතේ පමණක් බවත් ජීවන් තොණ්ඩමන් මහතා ප්‍රකාශ කළේය.
වතුකරය නියෝජනය කරන දේශපාලන පක්ෂවලට ලැබෙන ඡන්ද ප්‍රතිශතය අඩු කිරීමට ස්වාධීන කණ්ඩායම් කිහිපයක් නියෝජනය කරමින් වතුකරයේ තරුණ කණ්ඩායම් කිහිපයක් කටයුතු කරන බවත්, එම කණ්ඩායම්වලට හසු නොවී අලියා ලකුණ දිනවීමට කටයුතු කරන ලෙස ජීවන් තොණ්ඩමන් මහතා ඉල්ලා සිටී.
කොළඹ රැකියාවල නිරතව සිටින තම දරුවන් මැතිවරණ කාලයේ නි‍ෙවසට පැමිණ ඡන්දය අහවල් ලකුණට දෙන ලෙස පවසා යළි ඔවුන් රැකියා ස්ථාන වෙත යන බවත්, ඉන් අනතුරුව වතුකරයේ රැඳී සිටින්නේ වතු කම්කරුවන් බවත් ඔහු පෙන්වා දුන්නේය.
හිටපු ජනාධිපති ගෝඨාභය රාජපක්ෂ මහතා වටා සිටි විශාල පිරිසක් මේ වන විට විවිධ දේශපාලන කණ්ඩායම්වලට බෙදී මහමැතිවරණයට ඉදිරිපත් වී ඇති බවත්, ලංකා කම්කරු කොංග්‍රසය කිසි දිනක දේශපාලන වාසි තකා කටයුතු නොකරන පක්ෂයක් බවයි ඒ මහතා ප්‍රකාශ කළේය.
