උගන්ඩාවේ සඟවා ඇතැයි කියන, මුදල් ලංකාවට ගෙනවිත් ජනතාවට සහන සලස්වා, ජනතාව මත ඇති ජීවන බර ලිහිල් කරනු ඇතැයි බලාපොරොත්තු වෙන බව ශ්‍රී ලංකා පොදුජන පෙරමුණේ මහ ලේකම් හිටපු පාර්ලිමේන්තු මන්ත්‍රී නීතිඥ සාගර කාරියවසම් මහතා පවසයි. ශ්‍රී ලංකා පොදුජන පෙරමුණේ ප්‍රධාන කාර්යාලයේ අද (25) පැවති මාධ්‍ය හමුවකදී හෙතෙම එසේ පැවසීය.
තෙල් පෝලිමට කලින්, පොල් පොලිම් යුගයක් නිර්මාණය කර ඇති බවත්, පොල් ගෙඩියක් ගැනීමට නොහැකි තරම් ජනතාව අසීරුවට පත්කර ඇති අතර, සියලු කාරණා වලට පෙර ජනතාවගේ ජීවන බර සැහැල්ලු කළ යුතු බවද සාගර කාරියවසම් මහතා සඳහන් කළේය.
කාරියවසම් මහතා මෙසේ ද කීවේය. “ මේ රටේ ජනතාව ශ්‍රී ලංකා පොදුජන පෙරමුණෙන් ජනාධිපතිවරයෙක් බිහි කරන්නේ හැටනව ලක්ෂයක ජනවරමකුත් ඒ වගේම පාර්ලිමේන්තුවට තුනෙන් දෙකක බලයකුත් දීලා. ලොකු බලාපොරොත්තු ඇතිව මේ රටේ වෙනසක් කළා 2019 – 2020 කියන කාලයේ. නමුත් මේ රටේ ඇතිවෙච්ච කොවිඩ් වසංගතය දීර්ඝකාලයක් රට වසා තැබීම මත මේ රටේ ආදායම් ඉපයීම අහිමි වීමත් කියන කාරණා මත මේ රටේ ආර්ථිකය ඉතාම අපහසු තත්වයකට පත්වෙලා ඒ කාරණ මත තමයි ජනාධිපතිවරයාට සහ අපේ රජයට අතහරින තැනට කරුණු සිදු වුණේ.
මේ ආර්ථිකය කඩාවැටීමට හේතුව රට වසා තැබීම සහ කොවිඩ් වසංගතයත් මත ඇති වෙච්ච ප්‍රතිපලය කියන කාරණයත්, ඊට කලින් යහපාලන රජය කාලයේ රනිල් වික්‍රමසිංහ මැතිතුමා ඉතා විශාල ණය ප්‍රමාණයක් අරගෙන, ඒ ණය ප්‍රමාණය මත රටේ ආර්ථිකයට දැඩි බරක් කියන කාරණය වසන් කරලා දිගින් දිගටම ජනතාවට කිව්වේ මේ රාජපක්ෂවරු සහ අපේ ආණ්ඩුව ජනතාවගේ මුදල් හොරකම් කරලා සීශේල්ස් වලට යැව්වා, උගන්ඩාවට යැව්වා කියලා. මේ රටේ තිබෙන විදේශ විනිමය විදේශ රටවලට යවලා ඒ මත මේ රටේ ආර්ථිකය කඩාවැට්ටුවා කියන කාරණය තමයි ජනතාවගේ මනසට ඇතුල් කළේ. මේ තත්ත්වය යටතේ මේ රටේ ජනතාව ජනතා විමුක්ති පෙරමුණ දිගින් දිගටම මතුරවපු හොරකම, වංචාව කාරණය ඉතා දැඩිව විශ්වාස කළා. ඒ නිසා තමයි පොහොට්ටුවට ඡන්දය දීපූ ජනතාව ඒ ජනතා විමුක්ති පෙරමුණ කිව්ව කතා විශ්වාස කරලා ශ්‍රි ලංකා පොදුජන පෙරමුණ සමඟ හිටපු , මේ රටේ ජාතිකත්වයට ගරු කරන ජනතාව පසුගිය ජනාධිපතිවරණයේදී ඡන්දය දුන්නේ. හැබැයි අපි මාලිවේ ඔබ සැමට කියන්න ඕන ඔබතුමන්ලා ජනතාවට කිව්වේ මේ රටේ සල්ලි හොරකම් කරලා , පිටරට යවලා මේ රට කඩාවැටුණා කියලා නම්, දැන් ජනතාව බලාගෙන සිටිනවා එය ඔප්පු කරන්කන්. ඒ නිසා කරුණාකරලා සීශේල්ස් වල නැතිනම් උගන්ඩාවේ ඒ කිව්ව සල්ලි වහාම ලංකාවට ගෙනල්ලා මේ තිබෙන ණය ගෙවලා ජනතාවට සහන සැලැස්වීමට ආණ්ඩුව පියවර ගත යුතුයි.
