දේශපාලන හේතූන් මත තම ස්වාමිපුරුෂයා වන විජය කුමාරතුංග මහතා ඝාතනය කළ පරිදි තමාව ද ඝාතනය කිරීමේ කුමන්ත්‍රණයක් ඇතැයි සැක මතුව තිබෙන බව හිටපු ජනාධිපතිනි චන්ද්‍රිකා බණ්ඩාරනායක කුමාරතුංග මහත්මිය පවසයි. තමාට ලබා දී ඇති ආරක්ෂක පිරිස අඩුකිරීම සම්බන්ධයෙන් මහජන ආරක්ෂක අමාත්‍යාංශ ලේකම් රවී සෙනෙවිරත්න මහතා වෙත ලිපියක් යොමු කරමින් හිටපු ජනාධිපතිවරිය මේ බව සඳහන් කර තිබේ.
ජ්‍යෙෂ්ඨ නියෝජ්‍ය පොලිස්පති අජිත් හේමසිරි මහතා ඔක්තෝබර් මස 31 වන දින නිකුත් කළ ලිපියෙන් 50 දෙනෙකුගෙන් යුත් තම ආරක්ෂක පිරිස 30 දක්වා අඩු කිරීමට නියම කර ඇතැයි හිටපු ජනාධිපතිනිය පෙන්වා දෙයි.
අනෙකුත් හිටපු ජනාධිපතිවරුන්ට 243 දෙනෙකු සහ 200 දෙනෙකුගෙන් සහ 109 දෙනෙකුගෙන් යුත් ආරක්ෂක කණ්ඩායම් ලබාදෙන අතර, තමාට පමණක් ආරක්ෂකයින් 30ක් ලබාදීමට තීන්දු කළේ කුමන නිර්ණායකයන්ට අනුව දැයි තමාට ප්‍රහේළිකාවක් බව අදාළ ලිපියෙන් විමසා ඇත. තවද, විශ්‍රාමික ජනාධිපතිවරුන් පස්දෙනාගෙන් වැඩිම තර්ජන තිබෙන්නේ තමාට බවත් ඝාතන උත්සාහයකට ලක්ව තුවාල ලැබූ එකම ජනාධිපති තමා බවත් හිටපු ජනපතිනිය සිය ලිපියෙන් පෙන්වා දී තිබෙන්නීය.
විශ්‍රාම ලබා සිටියත් කෙසේ හෝ ඝාතනය කරන බවට එල්ටීටීඊ සංවිධානය විසින් 2006 සහ 2014 යන වසරවල ප්‍රසිද්ධියේ ප්‍රකාශ නිකුත් කර ඇති බව පොලිස් බුද්ධි වාර්තාවලින් තමාට දන්වා ඇතැයි ද හිටපු ජනාධිපතිනිය ලිපියේ දක්වා තිබේ. එසේ තිබිය දී හිටපු ජනාධිපති මහින්ද රාජපක්ෂ මහතාට හමුදා නිලධාරීන් 63ක් සහ පොලිස් නිලධාරීන් 180කින් යුත් ආරක්ෂක නිලධාරීන් 243 දෙනෙක් සහ මෛත්‍රීපාල සිරිසේන මහතාට පොලිස් නිලධාරීන් 109ක්, ගෝඨාභය රාජපක්ෂ මහතාට පොලිස් නිලධාරීන් 25ක් සහ හමුදා නිලධාරීන් 175කින් යුත් ආරක්ෂක නිලධාරීන් 200කගේ ආරක්ෂාවක් සිටිය දී තමාගේ ආරක්ෂාව 50 සිට 30ට අඩුකර ඇති බව චන්ද්‍රිකා කුමාරතුංග මහත්මිය මහජන ආරක්ෂක අමාත්‍යාංශ ලේකම්වරයාට යොමු කළ ලිපියේ වැඩිදුරටත් දැක්වේ.
ජනාධිපතිවරණ සමයේ තමන් බලයට පැමිණි විට ප්‍රභූ ආරක්ෂාව ලබා නොගන්නා බව ජවිපෙ නායකයින් පැවසුව ද ඔවුන් බලයට පත්වූ පසුව රජයේ නායකයින්ට සිය ගණනින් ආරක්ෂක බලමුළු සපයා ඇත්තේ රජය ද අප රටේ ප්‍රභූවරුන්ට යම්කිසි ආරක්ෂාවක් තිබිය යුතු බව පිළිගන්නා නිසා නොවේ ද යන්න හිටපු ජනාධිපතිනිය අදාළ ලිපියෙන් ප්‍රශ්න කර තිබේ.
එම ලිපිය පහතින්
