පාස්කු ඉරිදා බෝම්බ ප්‍රහාර මාලාවට වගකිවයුත්තන් කණ්ඩායමක් පිළිබඳව ලබන අප්‍රේල් 21 වනදාට පෙර අනාවරණය කිරීමට උත්සාහ කරන බව ජනාධිපති අනුර කුමාර දිසානායක මහතා පවසයි. ජනාධිපතිවරයා මේ බව පැවසුවේ අද (30) දෙයියන්දර ප්‍රදේශයේ පැවති ජනහමුවක් අමතමිනි.
“වංචා දූෂණ පිළිබඳව පමණක් නෙවෙයි අපරාධ පිළිබඳ පවා, පාස්කු ප්‍රහාරය පිළිබඳ පවා, පරීක්ෂණ ඉතා විධිමත්ව දියත් වෙමින් තිබෙනවා. මේ අප්‍රේල් මාසයේ 21වනදාට නැවත පාස්කු ප්‍රහාරයේ දිනය සිහිපත් වෙනවා. බොහෝ දුරට අපේ අපරාධ පරීක්ෂණ දෙපාර්තමේන්තුව උත්සාහ දරමින් තිබෙනවා අප්‍රේල් 21වනදා පෙර එයට වගකිව යුතු සැලකිය යුතු කණ්ඩායමක් හෙළිදරව් කරන්න. කරන්න ඕනෙ නැද්ද ? කරන්න ඕනෙ”
එළඹෙන අප්‍රේල් 21 වනදාට පාස්කු ඉරිදා බෝම්බ ප්‍රහාර මාලාව සිදුවී වසර හයක් සපිරේ.
